He thu hi ka Christian Walk Journal-ah 1/6/24 4:38pm khan ka ziak a, vawiin hian edited vesion kan dah leh a ni.
Luke 8:41 Tin, ngai teh, mi pakhat a hming Jaira, inkhawmna in hotu chu a lo kal a, Isua ke bulah a bawkkhup a, a ina kalah a ngen a…
Jaira hian Isua chanchin chu tlang kam aṭangin a lo hre ve a ni mah na, a fanu damlo kha Isuan a tih dam theih a ring a, chu rinna chuan, Isua hnenah a hruai thleng a, an in ngeiah Isua a hruai luhtir a ni.
Thawnthu hriata Isua chanchin hriatna nen Kristian ni ve bawk mah ila, chu hriatna chuan Isua hnenah min hruai thlen loh chuan amah nen intawhna nung neitu, a thisen zara damna famkim changtu kan ni kher lo. Hriatna chu rinna leh beiseina nen amah kan auhna in a zui hian, damna thlen turin tidamtu nen kan in tawk ṭhin. Pathian beisei a, rinna a pen chhuakte Pathian thiltihtheihna chuan a thlen chilh ṭhin a ni.
Pathian beiseina chu amah auhna nena suih zawm ngai lo ten, an hnena Pathian inpuanna hun remchang an hmu lo fova. Pathian beiseina chu amah auhna/ṭawngṭaina/Pathian nen lehdunna nena suih zawm tlattu ten Pathian inpuanna duhawm an nghak chhuak ṭhin.
Rinnaa pen chhuah hi a hlawk asin, Jaira’n Isua a koh hian, Isuan Jaira in a panna kal kawng hi hmeichhe thi put beidawng tan damna hun remchang a ni a. Rinna in kan awmhmun ata min thawh chhuahtir hian, tu emaw tan damna hun remchang siamtu kan ni tel bawk ṭhin.
Hmangaih avanga min zawngtu hian amah beiseia autu, a hnen pantute a tawk ngei ngei ṭhin a, rinnaa pen chhuakte nunah an rin Isua a pen lut ngei ngei ṭhin.
Spjohntenten-120526 6:47am
